Madaqaskarın paytaxtı Antananarivoda davam edən etirazlar siyasi böhranı daha da dərinləşdirib.

Qutb.az xəbər verir ki, "Jeune Afrique" nəşrinin məlumatına görə, prezident Andri Radzuelina paytaxtı tərk edib.

Etirazlar sentyabrın 25-dən başlayıb. Aksiya iştirakçıları əvvəlcə su və elektrik enerjisinə çıxışın yaxşılaşdırılmasını, səhiyyə sisteminin bərpasını və korrupsiyaya qarşı mübarizə tələb edirdilər. Zamanla tələblər genişlənib və prezidentin istefası gündəmə gəlib.

Radzuelina 2009-cu ildə baş verən etirazlar nəticəsində hakimiyyətə gəlmiş, 2019-cu və 2023-cü ildə isə prezident seçilmişdi. Lakin son illər iqtisadi durğunluq və sosial bərabərsizlik onun reytinqinə ciddi zərbə vurub.

BMT-nin məlumatına görə, iğtişaşlar zamanı azı 22 nəfər həlak olub, yüzdən çox insan yaralanıb. Prezident 29 sentyabrda hökumətin istefasını elan etsə də, bu,ə qərar küçələrdəki gərginliyi azaldmayıb.

Beynəlxalq Valyuta Fondunun açıqlamasına əsasən, 30 milyon əhalisi olan Madaqaskarda cəmi üçdə birinin elektrik enerjisinə çıxışı var.