ABŞ Prezidenti Donald Tramp Hindistan və Pakistanın tam və dərhal qüvvəyə minən atəşkəs barədə razılığa gəldiyini bəyan edib.

Qutb.az-ın məlumatına görə, o bildirib ki, danışıqlar ABŞ-ın vasitəçiliyi ilə uzun və gərgin gecə boyu aparılıb və nəticədə tərəflər 10 may, şənbə günü, yerli vaxtla saat 17:00-da (Bakı vaxtı ilə 15:30) atəşkəsə başlayıb.

Tramp bu barədə "Truth Social" sosial şəbəkəsində paylaşım edib, hər iki ölkəni “zəka və sağlam düşüncə nümayiş etdirdiklərinə görə” təbrik edib.

ABŞ Dövlət katibi Marko Rubio da sosial şəbəkə hesabında bildirib ki, son 48 saat ərzində o və ABŞ vitse-prezidenti Ci Di Vens Hindistan və Pakistan rəsmiləri ilə intensiv danışıqlar aparıblar. Nəticədə tərəflər neytral ərazidə geniş mövzuları əhatə edəcək danışıqlara başlamağa razılaşıblar.

Pakistanın baş nazir müavini və xarici işlər naziri İshaq Dar Hindistanla atəşkəsi təsdiqləyib. Hindistan da atəşkəsi təsdiqləsə də, bildirib ki, Pakistan ərazisindən həyata keçiriləcək istənilən hücum yeni müharibəyə səbəb olacaq.

CNN-in Hindistan tərəfinə istinadla verdiyi məlumata görə, atəşkəs birbaşa telefon danışığı ilə razılaşdırılıb.

Atəşkəs elanından sonra Pakistanın hava məkanı bütün uçuşlar üçün açılıb, ölkə hava limanları fəaliyyətini bərpa edib. Bununla belə, Hindistan Pakistanla bağlı qəbul etdiyi bəzi məhdudiyyətləri, o cümlədən Hind çayı sularına dair müqavilənin dayandırılması qərarını qüvvədə saxlayacaq. Ticarət və viza sahəsindəki məhdudiyyətlər də hələ ləğv olunmayıb.

Xatırladaq ki, Hindistanın zərbələrinə cavab olaraq 10 may səhər saatlarında Pakistan Hindistana qarşı genişmiqyaslı hərbi əməliyyata başladığını elan edib. Pakistan tərəfi bildirib ki, əgər Hindistan döyüşləri dayandırarsa, İslamabad da geri çəkiləcək.

Döyüşlər yenidən başlayacaq?

İki necə dövləti arasında baş verən bu son eskalasiya beynəlxalq ictimaiyyətin ciddi narahatlığına səbəb olub. Hazırkı atəşkəs razılaşması regionda gərginliyin azaldılması istiqamətində mühüm addım kimi qiymətləndirilir.

Atəşkəs razılaşmasının əldə olunması regionda müsbət siqnal kimi qəbul edilsə də, münaqişənin köklü səbəbləri hələ də həll olunmamış qalır. Hindistan və Pakistan arasında Cammu və Kəşmir bölgəsi üzərindəki ərazi mübahisəsi, qarşılıqlı ittihamlar və dərin etimadsızlıq vəziyyəti sabit saxlamağı çətinləşdirir.

Tərəflərin növbəti addımı olaraq neytral ərazidə diplomatik danışıqların başlanması planlaşdırılır. Bu danışıqlar təkcə hərbi gərginlik deyil, həm də su resursları, ticarət, sərhəd təhlükəsizliyi və terrorçuluqla mübarizə kimi məsələləri əhatə edəcək.

Buna baxmayaraq, tərəflərdən biri hər hansı razılaşmanı pozarsa, vəziyyətin sürətlə pisləşməsi ehtimalı qalır.