Amerikalı jurnalist Taker Karlson ABŞ Prezidenti Donald Trampın Venesuela ilə müharibə elan edə biləcəyini iddia edib.

Qutb.az xəbər verir ki, bu barədə o, “Judging Freedom” podkastında danışıb.

Karlsonun sözlərinə görə, bu bəyanat Trampın Ağ evin Oval kabinetindən xalqa planlaşdırılan müraciəti zamanı səslənə bilər.

Jurnalist bildirib ki, Konqres üzvlərindən biri ona qanunvericilərin bir gün əvvəl “qaçılmaz müharibə” ilə bağlı məlumatlandırıldığını deyib. Karlson qeyd edib ki, həmin məlumata əsasən, bu məsələ prezidentin axşam saat 9-da xalqa müraciəti zamanı açıqlana bilər.

Donald Trampın müraciəti ABŞ ilə Venesuela arasında gərginliyin artdığı bir vaxta təsadüf edir. Son dövrlər Vaşinqton Karib hövzəsində hərbi fəallığını artırıb, eyni zamanda Karakası narkotik ticarəti və digər cinayətlərdə ittiham edir. Ağ ev prezidentin çıxışının mövzusunu əvvəlcədən açıqlamayıb.

Məlumatlara görə, noyabr ayına qədər Karib hövzəsində Venesuela yaxınlığında ABŞ-ın esmines və desant gəmiləri daxil olmaqla hərbi gəmilərdən ibarət qruplaşması yerləşdirilib. Regionda ABŞ hərbçilərinin sayının 16 min nəfərə çatdığı bildirilir.